நீதிமன்ற உத்தரவால் ‘அகண்டா 2’ வெளியீடு காலவரையின்றி நிறுத்தம்
நந்தமூரி பாலகிருஷ்ணா நடிப்பில், இயக்குநர் போயபதி சீனு இயக்கத்தில் உருவாகியுள்ள அகண்டா 2 திரைப்படத்தின் வெளியீடு காலவரையின்றி ஒத்திவைக்கப்படுவதாக அதிகாரப்பூர்வமாக அறிவிக்கப்பட்டுள்ளது. இது ரசிகர்களுக்கு “பெரும் அதிர்ச்சியாக” அமைந்துள்ளது. டிசம்பர் 5-ஆம் தேதி வெளியாகவிருந்த இந்தப் படத்திற்கு, சென்னை உயர் நீதிமன்றத்தின் தடை உத்தரவு காரணமாக இந்த நிலை ஏற்பட்டுள்ளது.
வெளியீட்டிற்குச் சில மணி நேரங்களே இருந்த நிலையில், சென்னை உயர் நீதிமன்றத்தின் டிவிஷன் பெஞ்ச் (Division Bench) பிறப்பித்த உத்தரவின்படி, ₹28 கோடி பணத்தைத் தொகையைச் செலுத்தும் வரை, இந்தப் படத்தை திரையரங்குகளில், ஓடிடி தளங்களில் அல்லது சாட்டிலைட் மூலம் (Satellite) எங்கும் வெளியிடக் கூடாது என்று முழுமையான தடை விதிக்கப்பட்டுள்ளது.
பழைய ‘₹28 கோடி கடன் பிரச்சனையே காரணம்
இந்தத் திடீர் தடைக்குக் காரணம், படத்தின் தயாரிப்பு நிறுவனமான 14 ரீல்ஸ் பிளஸ் (14 Reels Plus) நிறுவனம் மீதான பழைய நிதிப் பிரச்சனை ஆகும். ஈரோஸ் இன்டர்நேஷனல் (Eros International) என்ற நிறுவனத்திடம் இருந்து, 14 ரீல்ஸ் எண்டர்டெயின்மென்ட் (14 Reels Entertainment) என்ற அதன் தொடர்புடைய நிறுவனம் வாங்கியிருந்த கடன் தொடர்பாக இந்தப் பிரச்சனை உள்ளது. ‘தூக்குடு’ (Dookudu) போன்ற முந்தைய படங்களின் போது ஏற்பட்ட இந்தச் சண்டையில், ஈரோஸ் நிறுவனத்திற்கு சுமார் ₹28 கோடி தொகையைச் செலுத்த வேண்டும் என நீதிமன்றம் முன்பே உத்தரவிட்டிருந்தது.
ஆனால், இந்தத் தொகையை 14 ரீல்ஸ் நிறுவனம் இன்னும் செலுத்தவில்லை. அதனால், பணத்தைத் திரும்பப் பெறுவதற்காக, ஈரோஸ் நிறுவனம் இப்போது வரவிருக்கும் அகண்டா 2 படத்தின் வெளியீட்டிற்கு தடை கோரி சென்னை உயர் நீதிமன்றத்தில் மேல்முறையீடு செய்தது. இந்த முறையீட்டை ஏற்ற நீதிமன்றம், தொகையைச் செலுத்தும் வரை படத்தை வெளியிடக் கூடாது என்று கடுமையான உத்தரவைப் பிறப்பித்துள்ளது.
ரசிகர்களின் ஏமாற்றமும், தயாரிப்பாளரின் விளக்கமும்
இந்தத் தடையால், படம் பார்க்க ஆவலாக இருந்த ரசிகர்கள் பெரும் ஏமாற்றம் அடைந்துள்ளனர். வெளிநாடுகளில் 3 லட்சத்திற்கும் மேற்பட்ட டாலர்களுக்கும், உள்நாட்டு முன்பதிவுகளில் ஒரு லட்சத்திற்கும் மேற்பட்ட டிக்கெட்டுகளும் முன்பதிவு செய்யப்பட்டிருந்த நிலையில், அனைத்தும் வீணாகிவிட்டன.
இது குறித்து, 14 ரீல்ஸ் பிளஸ் நிறுவனம் சமூக வலைதளங்களில் ஒரு வருத்தமான அறிக்கையை வெளியிட்டது. அதில், “தவிர்க்க முடியாத சில சூழ்நிலைகளால் அகண்டா 2 படம் திட்டமிட்டபடி வெளியாகாது என்பதை கனத்த இதயத்துடன் தெரிவித்துக் கொள்கிறோம். ரசிகர்களின் ஏமாற்றத்தைப் புரிந்துகொள்கிறோம். இப்பிரச்சனையை விரைவில் தீர்க்க தொடர்ந்து உழைத்து வருகிறோம்” என்று குறிப்பிடப்பட்டுள்ளது. பாலகிருஷ்ணா-போயபதி சீனுவின் வெற்றி கூட்டணி திரும்பும் என்ற எதிர்பார்ப்பு இருந்த நிலையில், இந்தப் படத்தின் புதிய வெளியீட்டு தேதி எப்போது அறிவிக்கப்படும் என்று தெரியாமல் ரசிகர்கள் காத்திருக்கிறார்கள்.