பாலிவுட் உலகின் மூன்று மிகப்பெரிய நட்சத்திரங்கள் ஒரே திரையில் தோன்றினால் எப்படி இருக்கும்? அதுவும் ஒரு படத்திற்காக அல்ல, ஒரு விளம்பரத்திற்காக! ஆம், ஷாருக்கான், ரன்பீர் கபூர் மற்றும் ஆலியா பட் ஆகியோர் இணைந்து நடித்துள்ள ‘ரங்க்தா ஸ்டீல்’ (Rungta Steel) விளம்பரம் தான் இப்போது இணையத்தின் ஹாட் டாக். பிரபல இயக்குனர் சித்தார்த் ஆனந்த் இயக்கத்தில் வெளியாகியுள்ள இந்த வீடியோ, ரசிகர்களுக்கு ஒரு மினி திரைப்படத்தைப் பார்த்த அனுபவத்தைக் கொடுத்துள்ளது.
விக்ரம் ரத்தோர் vs அக்னி அஸ்திரம்: ஒரு ஜாலி மோதல்
சினிமா ரசிகர்களுக்குப் பிடித்தமான ‘சினிமாட்டிக் யூனிவர்ஸ்’ (Cinematic Universe) பாணியில் இந்த விளம்பரம் உருவாக்கப்பட்டுள்ளது. இதில் ஷாருக்கான் தனது பிளாக்பஸ்டர் படமான ‘ஜவான்’-ல் வரும் கம்பீரமான விக்ரம் ரத்தோர் கெட்டப்பிலும், ரன்பீர் கபூர் ‘பிரம்மாஸ்திரா’ படத்தின் சிவா கதாபாத்திரத்திலும் தோன்றுகின்றனர்.
விளம்பரத்தின் ஆரம்பமே அதிரடியாக இருக்கிறது. ரன்பீர் கபூர், ஷாருக்கானை நோக்கி ஒரு குத்து விடுகிறார். “தலையப் பாத்துக்கோங்க விக்ரம் ரத்தோர்.. நீங்க யாருன்னு மறுபடியும் மறந்துடாதீங்க,” என ரன்பீர் கிண்டலாகக் கூற (‘ஜவான்’ படத்தில் ஷாருக்கானுக்கு ஞாபக மறதி ஏற்படும் காட்சியை நினைவூட்டும் வகையில்), ஷாருக்கானோ சற்றும் சளைக்காமல் பதிலடி கொடுக்கிறார்.
“பொறு.. உன் அக்னி அஸ்திரத்தை இப்போவே மெழுகுவர்த்தியா மாத்துறேன் பாரு,” என ஷாருக்கான் கூறுவது ரசிகர்களைச் சிரிக்க வைத்துள்ளது.
ராணியின் என்ட்ரி: “என் வீட்டுப் பொருள் உடையுமே!”
இவர்கள் இருவரும் மோதிக்கொண்டிருக்க, இடையில் புகுந்து கலகலப்பூட்டுகிறார் ஆலியா பட். கரண் ஜோஹரின் ‘ராக்கி அவ்ர் ராணி கி பிரேம் கஹானி’ படத்தில் வரும் அதே ராணி கதாபாத்திரமாக, அழகான சேலையில் வந்து, “ப்ளீஸ் ஸ்டாப்!” என கத்துகிறார். பின்னணியில் “வாட் ஜும்கா” பாடல் ஒலிக்கிறது.
ஆனால் ஆலியா கவலைப்படுவது இவர்கள் சண்டையைப் பற்றி அல்ல, தனது வீட்டுப் பொருட்களைப் பற்றித்தான்! “என்னோட கவுண்டர் டாப் உடைஞ்சுடும்.. சிம்னி உடைஞ்சுடும்.. என்ன பண்றீங்க நீங்க?” என அவர் பதறுவது செம ரகளை. இறுதியில், அவர்கள் சண்டையிலும் உடையாமல் நிற்பது அந்த வீட்டின் தூண் (Pillar) மட்டுமே. அதுதான் ‘ரங்க்தா ஸ்டீல்’ என விளம்பரம் முடிகிறது.
இயக்குனரின் உற்சாகம் மற்றும் ரசிகர்களின் கொண்டாட்டம்
இந்த விளம்பரத்தை இயக்கிய சித்தார்த் ஆனந்த், “இதை ஷூட் பண்ணுனது செம ஜாலியா இருந்தது.. டூ மச் ஃபன்!” எனத் தனது எக்ஸ் (ட்விட்டர்) பக்கத்தில் பதிவிட்டுள்ளார்.
இணையத்தில் ரசிகர்கள் இந்த வீடியோவை கொண்டாடித் தீர்த்து வருகின்றனர். சில சுவாரஸ்யமான கமெண்டுகள் இதோ:
-
ஷாருக் வெறியர்கள்: “நான் இந்த விளம்பரத்தை மூன்று முறை பார்த்துவிட்டேன்.. என் கண்கள் ஷாருக்கானை மட்டுமே பார்க்கிறது. உண்மையிலேயே அவர்தான் கிங்!” என Mani என்ற ரசிகர் சிலாகிக்கிறார்.
-
பான் மசாலா சந்தேகம்: “இதை பார்த்ததும் நான் பான் மசாலா விளம்பரம்னு நெனச்சேன்.. கடைசியில அந்த கையை காட்டுவாங்களே.. அது மிஸ்ஸிங்,” என ArvindMuthuraman என்பவர் நகைச்சுவையாகக் பதிவிட்டுள்ளார்.
-
ரசிகர்களின் ஆசை: “விளம்பரமே இவ்வளவு மாஸா இருக்கே.. இவங்க மூணு பேரும் சேர்ந்து ஒரு படம் பண்ணா எப்படி இருக்கும்? ஆனா தயவு செஞ்சு அது பிரம்மாஸ்திரா-2 வா இருக்க வேணாம்,” என ஒரு நெட்டிசன் கோரிக்கை வைத்துள்ளார்.
-
ஃபேன் வார் வேண்டாம்: “திரையில் நடிகர்களுக்குள் இருக்கும் இந்த அழகான நட்பைப் பாருங்கள்.. ஆனால் முட்டாள் ரசிகர்கள் தான் இணையத்தில் சண்டையிட்டுக் கொள்கிறார்கள்,” என Litesh Thakur என்பவர் வேதனையோடு சுட்டிக்காட்டியுள்ளார்.
மொத்தத்தில், 41 நொடிகள் ஓடும் இந்த விளம்பரம், ஒரு முழு நீளப் படத்திற்கு இணையான எதிர்பார்ப்பை ஏற்படுத்தியுள்ளது என்றால் மிகையல்ல.
அடுத்தது என்ன? ரசிகர்களின் இந்த வரவேற்பைப் பார்க்கும் போது, பாலிவுட் இயக்குனர்கள் இவர்கள் மூவரையும் வைத்து விரைவில் ஒரு பிரம்மாண்டமான படத்தை இயக்க திட்டமிட்டால் ஆச்சரியப்படுவதற்கில்லை!
