“தளபதி பாய்ஸ்” சர்ச்சை: வெற்றியின் உச்சத்தில் ஏற்றிவிட்ட ஏணிகளை விஜய் மறந்துவிட்டாரா?

மலேசியாவின் பிரம்மாண்ட மேடையில், மின்னொளியில் ஜொலித்த ஜனநாயகன் இசை வெளியீட்டு விழா, நடிகர் விஜய்யின் திரையுலகப் பயணத்தின் இறுதி அத்தியாயங்களில் ஒன்றாகப் பார்க்கப்படுகிறது. முழு நேர அரசியல் பிரவேசத்திற்குத் தயாராகி வரும் விஜய், தனது தமிழக வெற்றிக் கழகம் (TVK) கட்சியை முன்னிறுத்திச் செல்லும் வேளையில், இந்த விழா பெரும் எதிர்பார்ப்பை ஏற்படுத்தியிருந்தது. ஆனால், அந்த ஆரவாரத்திற்குப் பின்னே, சமூக வலைதளங்களில் ஒரு சலசலப்பு தொடங்கியுள்ளது. அது, விழாவிற்கு வந்தவர்களைப் பற்றியதல்ல; வராதவர்களைப் பற்றியது.

சமூக வலைதளங்களில் வைரலாகும் அந்தப் புகைப்படத்தில் விஜய், தமிழ் சினிமாவின் தற்போதைய ட்ரெண்டிங் இயக்குநர்களான நெல்சன் திலீப்குமார், அட்லீ, மற்றும் லோகேஷ் கனகராஜ் ஆகியோருடன் காட்சியளிக்கிறார். இவர்களை “தளபதி பாய்ஸ்” (Thalapathy Boys) என்று ரசிகர்கள் கொண்டாடினாலும், மறுபுறம் ஒரு கடுமையான விமர்சனம் எழுந்துள்ளது. “தனது கடைசி காலத்தில், தன்னை இந்த உயரத்திற்குத் தூக்கிவிட்ட பழைய இயக்குநர்களை விஜய் மறந்துவிட்டாரா?” என்ற கேள்வியை நெட்டிசன்கள் முன்வைக்கின்றனர்.

நன்றிக்கடன் மறக்கப்பட்டதா?

இயக்குநர் நெல்சன் மேடையில் பேசுகையில், தாங்கள் மூவரும் தானாக வரவில்லை எனவும், விஜய்யால் அழைக்கப்பட்டே வந்ததாகவும் கூறியதுதான் இந்த சர்ச்சைக்குத் திரி கிள்ளியது. தற்போதைய இளைஞர்களிடம் செல்வாக்கு உள்ளவர்களை மட்டுமே விஜய் முன்னிலைப்படுத்துகிறார் என்றும், தனது அரசியல் கணக்கிற்காகவே இந்த “Gen Z” இயக்குநர்களைத் தேர்ந்தெடுத்துள்ளார் என்றும் விமர்சகர்கள் கருதுகின்றனர்.

ஆனால், இந்த உத்தி தமிழ் கலாச்சாரத்தின் ஆணிவேரான ‘நன்றி மறவாமை’ என்ற பண்போடு மோதுகிறது. “பாலியல் படங்களுக்கு இணையாக நடித்துக்கொண்டிருந்தவரை, குடும்பங்கள் கொண்டாடும் மென்மையான ஹீரோவாக மாற்றியவர் விக்ரமன். அவரை விஜய் அழைத்திருக்க வேண்டாமா?” என்று ஒரு இணையவாசி காட்டமாகப் பதிவிட்டுள்ளார்.

மறக்கப்பட்ட சிற்பிகள்: ஒரு பார்வை

விஜய் எனும் பிம்பத்தைக் கட்டமைத்ததில், இன்றைய “ஹைப்” இயக்குநர்களை விட, பழைய இயக்குநர்களுக்கே அதிக பங்கு உண்டு என்று பட்டியலிடுகிறார்கள் ரசிகர்கள்:

• விக்ரமன் (பூவே உனக்காக): விஜய்யின் ஆரம்பக்காலக் கவர்ச்சிப் படங்களை மாற்றி, அவரை ஒவ்வொரு வீட்டிலும் ஒரு பிள்ளையாக மாற்றியவர் விக்ரமன். அவர் இல்லையென்றால் விஜய்க்கு ‘ஃபேமிலி ஆடியன்ஸ்’ கிடைத்திருக்க வாய்ப்பில்லை.

• பாசில் (காதலுக்கு மரியாதை): கல்லூரி இளைஞர்களையும், பெண்களையும் விஜய்யின் பக்கம் திருப்பியவர் பாசில். விஜய்யை ஒரு சிறந்த நடிகராகவும் அடையாளம் காட்டியவர் இவரே.

• ரமணா (திருமலை): ‘சாக்லேட் பாய்’ ஆக இருந்த விஜய்யை, மீசை முறுக்கும் ‘ஆக்ஷன் ஹீரோ’வாக மாற்றிய பெருமை ரமணாவையே சேரும்.

• தரணி (கில்லி): விஜய்யின் மார்க்கெட்டை உச்சத்திற்கு கொண்டு சென்ற படம் கில்லி. மாஸ் ஹீரோவாக விஜய்யை நிலைநிறுத்தியதில் தரணிக்கு முக்கிய பங்குண்டு.

• ஏ.ஆர். முருகதாஸ் (துப்பாக்கி): தொடர் தோல்விகளால் துவண்டு போயிருந்த விஜய்யை, துப்பாக்கி மூலம் மீட்டெடுத்து, 100 கோடி கிளப்பில் இணைத்தவர் முருகதாஸ். “நன்றி உள்ளவராக இருந்தால் இவர்களைத்தான் முதலில் அழைத்திருக்க வேண்டும்,” என்கிறது இணையவாசிகளின் குரல்.

ரஜினி – கமல் பாடம்

இந்த விமர்சனங்களுக்கு வலு சேர்க்கும் விதமாக, சூப்பர்ஸ்டார் ரஜினிகாந்த் மற்றும் உலகநாயகன் கமஹாசன் ஆகியோரின் பண்புகளை ஒப்பிடுகின்றனர். ரஜினி இன்றும் தனது குருவான எஸ்.பி. முத்துராமனுக்கு மேடைகளில் முன்னுரிமை அளிக்கிறார். கமல், சிங்கீதம் சீனிவாசராவ் மற்றும் பாலச்சந்தர் ஆகியோரைத் தலையில் தூக்கி வைத்து கொண்டாடுகிறார்.

அவர்களோடு ஒப்பிடுகையில், விஜய் தனது வளர்ச்சிக்கான காரணகர்த்தாக்களை மறந்துவிட்டு, வெற்றியின் வெளிச்சத்தில் இருப்பவர்களுடன் மட்டும் கைகோர்ப்பது, அவரது முதிர்ச்சியின்மையை காட்டுவதாக விமர்சகர்கள் கூறுகின்றனர்.

அரசியல் கணக்கா?

ஒரு தரப்பினர், இது அரசியல் ரீதியான காய் நகர்த்தல் என்று வாதிடுகின்றனர். வரும் 2026 தேர்தலில் முக்கியப் பங்காற்றப்போகும் இளைஞர்களைக் கவரவே, விஜய் இளம் இயக்குநர்களைத் தனது மேடையில் ஏற்றியிருக்கலாம். அட்லீ, லோகேஷ் போன்றவர்கள் தரும் ‘சமூக வலைதள ரீச்’ (Social Media Reach) பழைய இயக்குநர்களால் கிடைக்காது என்பதே நிதர்சனம்.

இருப்பினும், சினிமா பயணம் முடியும் தருவாயில், தான் கடந்து வந்த பாதையைத் திரும்பிப் பார்க்காதவர், அரசியல் பாதையில் எப்படி மக்களுடன் பயணிப்பார் என்ற கேள்வியையும் இது எழுப்பியுள்ளது.