பாலுக்கு பதில் ‘கேம்பா’ கோலா: மங்காத்தா கொண்டாட்டத்தில் அஜித் ரசிகர்கள் செய்த புதுமையான அபிஷேகம்!

பாலாபிஷேகம் ஓரம் போச்சு… இனி எல்லாம் ‘கேம்பா’ அபிஷேகம்தான்: தியேட்டர்களை தெறிக்கவிடும் அஜித் ரசிகர்கள்!

தமிழ் சினிமாவின் ரசிகர்கள் என்றாலே ஒரு தனி வெறித்தனம் இருக்கும். அதிலும் நம் ‘தல’ அஜித் குமார் ரசிகர்கள் என்றால் சொல்லவா வேண்டும்? வழக்கமாக அஜித்தின் படம் வெளியாகிறது என்றால், தியேட்டர் வாசலில் திருவிழா கோலம் பூண்டிருக்கும். தாரை தப்பட்டை முழங்க, வானுயர கட்-அவுட்களுக்கு லாரி லாரியாக பால் ஊற்றி ‘பாலாபிஷேகம்’ செய்வதுதான் இவர்களின் பல வருட வழக்கம். ஆனால், இந்த வாரம் அந்த வழக்கத்தில் ஒரு மிகப்பெரிய மாற்றம் நிகழ்ந்துள்ளது.

சமீபத்தில் அஜித், பிரபல குளிர்பான நிறுவனமான ‘கேம்பா’ (Campa) வின் விளம்பர தூதராக ஒப்பந்தமானார். இந்த செய்தியை கெட்டியாக பிடித்துக்கொண்ட ரசிகர்கள், இந்த வாரம் திரையிடப்பட்ட அஜித்தின் பிளாக்பஸ்டர் படமான மங்காத்தா காட்சிகளின் போது, பாலுக்கு குட்பை சொல்லிவிட்டு, கையில் கேம்பா பாட்டில்களுடன் களமிறங்கியுள்ளனர். ஆம், நீங்கள் கேட்பது உண்மைதான்! அஜித்தின் கட்-அவுட்களுக்கு இப்போது நடப்பது பால் அபிஷேகம் அல்ல, ‘கேம்பா அபிஷேகம்’.

அஜித் தனது 50வது படமான மங்காத்தா-வில் விநாயக் மகாதேவனாக நெகட்டிவ் ரோலில் மிரட்டியிருப்பார். அந்தப் படத்தில் பணம் பறக்கும் காட்சிகள் அதிகம். தற்போது ரசிகர்கள் உருவாக்கியுள்ள போஸ்டர்களில், அஜித் கையில் கேம்பா பாட்டிலுடனும், பின்னணியில் பணம் பறப்பது போலவும் சித்தரிக்கப்பட்டுள்ளது, படத்தின் கதைக்கும் இந்த புதிய விளம்பரத்திற்கும் கச்சிதமாக பொருந்துகிறது.

சென்னை மற்றும் பல முக்கிய நகரங்களில் உள்ள திரையரங்குகளில், இந்த வாரம் முழுவதும் காட்சிகள் அரங்கம் நிறைந்துள்ளதாக (House-full) தகவல்கள் வெளியாகியுள்ளன. சமூக வலைத்தளமான X-தளத்தில் (Twitter) வெளியான வீடியோக்களில், ரசிகர்கள் கேம்பா பாட்டில்களைத் திறந்து, ஷாம்பெயின் போல பீய்ச்சி அடித்து கொண்டாடுவதை காண முடிகிறது.

“எங்க தல எதை கையில் எடுக்கிறாரோ, அதை நாங்களும் கொண்டாடுவோம். அவர் இப்போ கேம்பா விளம்பரத்துல வராரு, அதான் பாலுக்கு பதிலா இதை வச்சு அபிஷேகம் பண்றோம்,” என உற்சாகமாக கூறுகிறார்கள் ரசிகர்கள். பால் வீணாகிறது என்ற நீண்ட நாள் விமர்சனத்திற்கு இது ஒரு மாற்றாக அமைந்தாலும், சோடா அபிஷேகம் என்பது ஒரு புதுமையான மற்றும் விசித்திரமான கொண்டாட்டமாகவே பார்க்கப்படுகிறது.

எது எப்படியோ, படம் ரிலீஸ் ஆகி இத்தனை வருடங்கள் ஆனாலும், “மங்காத்தாடா” என்ற முழக்கம் இன்னும் குறையவில்லை. அஜித் ஒரு பிராண்டை தொட்டால் போதும், அது எந்த அளவுக்கு விற்பனையாகும் என்பதற்கும், அவர் மீது ரசிகர்கள் வைத்துள்ள பாசத்திற்கும் இந்த ‘கேம்பா கொண்டாட்டம்’ ஒரு சான்று.