தலைவர் தம்பி தலைமையில் விமர்சனம்: திருமணமா? இழவா? ஜிவாவின் தமாஷ் போராட்டம்!

கதைக்களம்

ஒரு சிறிய கிராமம், அங்கு ஒரு பஞ்சாயத்து தலைவர் ஜீவரத்தினம் (ஜீவா). ஊரில் எந்த நல்லது கெட்டது என்றாலும் அவர்தான் முன்னிற்க வேண்டும். அடுத்த தேர்தல் நெருங்கும் வேளையில், இளவரசுவின் மகள் சௌமியாவின் திருமணத்தை முன்னின்று நடத்தும் பொறுப்பு அவருக்கு கிடைக்கிறது. ஆனால், அதே ஊரில் இளவரசுவின் பரம எதிரியான மணி (தம்பி ராமையா) வீட்டில் ஒரு மரணம் நிகழ்கிறது.

கல்யாண முகூர்த்த நேரத்திலேயே சவ ஊர்வலத்தையும் நடத்த வேண்டும் என்று மணி பிடிவாதம் பிடிக்க, இரு வீட்டாருக்கும் இடையே ஈகோ போர் வெடிக்கிறது. இந்த இரண்டுக்கும் நடுவில் மாட்டிக்கொண்டு முழிக்கும் ஜீவா, எப்படி இந்த பிரச்சனையை சமாளிக்கிறார் என்பதே படத்தின் மீதிக்கதை.

நிறை மற்றும் குறை

படத்தின் மிகப்பெரிய பலம் அதன் யதார்த்தமான நகைச்சுவை. கிராமத்து மனிதர்களின் சிறிய குணாதிசயங்களையும், அவர்களின் பிடிவாதத்தையும் இயக்குனர் நிதீஷ் சாகதேவ் அழகாகப் படம்பிடித்துள்ளார். ஜீவா நீண்ட நாட்களுக்குப் பிறகு ஒரு துடிப்பான, எதார்த்தமான கதாபாத்திரத்தில் கச்சிதமாகப் பொருந்துகிறார். தம்பி ராமையா மற்றும் இளவரசு இடையிலான வசனப் போர் சிரிப்புக்கு கியாரண்டி.

இருப்பினும், இரண்டாம் பாதியில் படம் சற்று திசைமாறுகிறது. நாயகி காட்டில் ஓடுவது, தேவையற்ற குழப்பங்கள் என திரைக்கதை சற்று தொய்வடைகிறது. படத்தின் கிளைமாக்ஸ் இன்னும் சிறப்பாக இருந்திருக்கலாம் என்று தோன்றுகிறது. சமூக கருத்துக்களை சொல்ல முயன்றாலும், சில இடங்களில் அது மேலோட்டமாகவே இருக்கிறது.

முடிவு

‘தலைவர் தம்பி தலைமையில்’ ஒரு சுமாரான பொழுதுபோக்குத் திரைப்படம். குடும்பத்துடன் அமர்ந்து ஒருமுறை பார்க்கலாம். பெரிய எதிர்பார்ப்புகள் இல்லாமல் சென்றால், இந்த பஞ்சாயத்து உங்களுக்குச் சிரிப்பைத் தரும்.

CINEMA SPICE RATING: ★★½ (2.5/5)