சமீபகாலமாக, இணையத்தில் நகைச்சுவை காணொளிகள் மூலம் பிரபலமான இயக்குநர்கள் ஹாரர் படங்களை இயக்க வரும்போது, அவை உலகத்தரம் வாய்ந்த திகில் படங்களாக மாறுகின்றன. அந்த வரிசையில், 2025-ல் யூடியூப் உலகிலிருந்து வந்து ஹாலிவுட்டை மிரள வைத்திருக்கும் இயக்குநர் கறி பார்கரின் அப்செஷன் திரைப்படம், தற்கால மனித உறவுகளின் இருண்ட பக்கத்தை அப்பட்டமாக பேசுகிறது.
இந்த கதையின் நாயகன் பேர் (மைக்கேல் ஜான்ஸ்டன்), ஒரு இசைக்கடையில் வேலை செய்யும் சாதாரண இளைஞன். தன் சிறுவயது தோழியான நிக்கி (இந்தி நவரெட்) மீது அவனுக்கு தீராத காதல். ஆனால், அதை அவளிடம் நேராக சொல்ல பயந்து, ‘நல்லவன்’ போல நடித்து வருகிறான். ஒரு நாள் இரவு, தற்செயலாக ஒரு அமானுஷ்ய கடைக்கு செல்லும் அவன், ‘ஒன் விஷ் வில்லோ’ (One Wish Willow) என்ற விசித்திரமான பொம்மையை வாங்குகிறான். அந்த பொம்மையின் குச்சியை உடைத்து நாம் என்ன வேண்டினாலும் நடக்கும் என்பது அதன் ஐதீகம்.
மறுநாளே அந்த மந்திர சக்தி வேலை செய்ய ஆரம்பிக்கிறது. நிக்கி தன் சுயநினைவை இழந்து, பேரின் மீது அதீத, வெறித்தனமான காதல் கொள்ளத் தொடங்குகிறாள். ஆரம்பத்தில் இது பேருக்கு மகிழ்ச்சியை தந்தாலும், போகப்போக நிக்கியின் நடத்தை பயங்கரமானதாக மாறுகிறது. அவள் அவ்வப்போது தன் பழைய நிலைக்கு வந்து, மரண பயத்தில் அலறிவிட்டு, மீண்டும் பேரை கட்டிப்பிடித்து காதல் மழை பொழிகிறாள்.
நடிப்பில் மிரட்டிய இந்தி நவரெட்
இந்த படத்தின் முழு பலமும் நிக்கியாக நடித்திருக்கும் இந்தி நவரெட்டின் அசாத்திய நடிப்புதான். ஒரே உடலில் வாழும் மூன்று வெவ்வேறான மனிதர்களை தன் முகபாவனைகள் மூலமே காட்டியுள்ளார். காதலில் உருகும் பெண், பேய்பிடித்தவள் போல அலறும் ஒரு அமானுஷ்ய உருவம், தனக்கு நடக்கும் கொடுமையில் இருந்து தன்னை காப்பாற்றும்படி கெஞ்சும் ஒரு பாவம் நிறைந்த ஆத்மா என நிக்கியின் கதாபாத்திரம் நம்மை நடுங்க வைக்கிறது.
ஒளிப்பதிவாளர் டெய்லர் கிளெமன்ஸ், பேரின் சிறிய அறைக்குள்ளேயே பெரும்பாலான காட்சிகளை படமாக்கி, நமக்கும் அந்த அறைக்குள் மாட்டிக்கொண்டது போன்ற ஒரு மூச்சுத்திணறல் உணர்வை ஏற்படுத்தியுள்ளார். நிக்கியை எப்போதும் நிழல்களிலும் இருட்டிலும் காட்டி, அவளது கண்கள் மட்டுமே தெரியும்படி செய்திருப்பது படத்தின் பயத்தை இருமடங்காக்குகிறது. டேவிட் கிச்சன்ஸின் ஒலி அமைப்பும், ராக் பர்வெல்லின் பின்னணி இசையும் தியேட்டரில் இருக்கும் அமைதியைக்கூட ஒரு பயங்கரமான அனுபவமாக மாற்றுகின்றன.
‘நல்லவன்’ என்ற முகமூடி உடையும் தருணம்
பொதுவாக வரும் பேய் படங்களில், அமானுஷ்ய சக்தியால் பாதிக்கப்படும் பெண்களைத்தான் நாம் பரிதாபமாக பார்ப்போம். ஆனால், இந்த படம் பேரின் பார்வையில் இருந்து நகர்கிறது. தனக்கு ஒரு பெண் வேண்டும் என்பதற்காக, அவளது ஆன்மாவையும் சுயசிந்தனையையும் திருடி, அவளை ஒரு ரோபோ போல மாற்றி ரசிக்கும் பேரின் சுயநலம், எந்த ஒரு அமானுஷ்ய பேயை விடவும் கொடூரமானது என்பதை இயக்குநர் மிக அழகாக காட்டியுள்ளார்.
இறுதிக்காட்சியில், நிக்கியின் சிதைந்த உடலையும், ரத்தம் சொட்டும் சூழலையும் பார்க்கும்போது, இது ஒரு சாதாரண திகில் படம் அல்ல, மாறாக ஒரு பெண்ணின் சுதந்திரத்தை பறிக்கும் ஆண்களின் அதிகார வெறிக்கு எதிரான ஒரு சாட்டையடி என்பது புரிகிறது. இந்த ‘அப்செஷன்’, உங்களை நீண்ட நாட்களுக்கு தூங்க விடாமல் அச்சுறுத்தும் என்பதில் சந்தேகமில்லை!
CINEMA SPICE RATING: ★★★½ (3.5/5)