தமிழ் திரையுலகில் நகைச்சுவை நடிகராக கோலோச்சியவர்கள், கதாநாயகனாக தங்களை நிலைநிறுத்திக் கொள்ளும் முயற்சி என்பது எப்போதுமே சவாலான பயணம். சமகாலத்தில் இந்த மாற்றத்தை நிகழ்த்திய இரண்டு முக்கிய முகங்கள் சந்தானம் மற்றும் சூரி. இருவருமே முன்னணி நகைச்சுவை நடிகர்களாக வலம் வந்து, பின்னர் கதாநாயகர்களாக உருவெடுத்தவர்கள் என்றாலும், அவர்கள் தேர்ந்தெடுத்த பாதையிலும் அதன் முடிவுகளிலும் மிகப்பெரிய இடைவெளி இருப்பதை தற்போதைய திரை நிலவரம் தெளிவாக உணர்த்துகிறது.
சந்தானம் கதாநாயகனாக அடியெடுத்து வைத்தபோது அவருக்கு மிகப்பெரிய ரசிகர் பட்டாளமும் அசைக்க முடியாத வரவேற்பும் இருந்தது. ஆனால், கிட்டத்தட்ட இருபது படங்களில் முன்னணி கதாபாத்திரங்களில் நடித்த பிறகும், அவரால் ஒரு முழுமையான நடிகராக அடுத்த கட்டத்திற்கு நகர முடியவில்லை என்பதே நிதர்சனம். ஒரே மாதிரியான கவுண்டர் வசனங்கள், தன்னை ஒரு வழக்கமான கமர்சியல் ஹீரோவாகவே காட்டிக்கொள்ள வேண்டும் என்கிற பிடிவாதம், அழுத்தமான கதைகளைத் தேர்ந்தெடுக்கத் தயங்கியது ஆகியவை அவரது படங்களை விரைவிலேயே சலிப்படையச் செய்தன. நகைச்சுவைக்காக வந்தவர்கள் கூட முழுமையான திருப்தியின்றி திரும்பும் நிலைக்கு அவரது படங்களின் திரைக்கதை தரம் வீழ்ச்சியடைந்தது. தன்னை முழுமையாக ஒரு மாறுபட்ட கதைக்களத்திற்கு ஒப்படைக்கத் தவறியதே அவரது சறுக்கல்களுக்கு பிரதான காரணமாக அமைந்தது.
ஆனால், இதற்கு முற்றிலும் நேர்மாறான பாதையைத் தேர்ந்தெடுத்து வியக்க வைத்தார் நடிகர் சூரி. கதாநாயகனாக அறிமுகமாகும் முதல் படத்திலேயே வழக்கமான கமர்சியல் சமரசங்களைத் தவிர்த்து, இயக்குனர் வெற்றிமாறனின் விடுதலை திரைப்படத்தில் குமரேசன் என்கிற எளிய, அழுத்தமான காவலர் கதாபாத்திரத்தை ஏற்று ஒட்டுமொத்த திரையுலகையும் புருவம் உயர்த்த வைத்தார். தனது முந்தைய நகைச்சுவை அடையாளத்தை முற்றிலும் துறந்து, ஒரு தீவிரமான குணச்சித்திர நடிகராக அவர் காட்டிய அர்ப்பணிப்பு தமிழ் சினிமா ரசிகர்களைப் பெரிதும் கவர்ந்தது.
அதைத் தொடர்ந்து வந்த ஒவ்வொரு படத்திலும் சூரியின் முதிர்ச்சி வெளிப்பட்டது. கருடன் திரைப்படம் மூலமாக விறுவிறுப்பான ஆக்ஷன் களத்திலும் தன்னால் தடம் பதிக்க முடியும் என நிரூபித்தார். சர்வதேச அளவில் விருதுகளையும் பாராட்டுகளையும் குவித்த கொட்டுக்காளி படத்தில், வழக்கமான ஹீரோயிச சமரசங்கள் எதுவுமின்றி துணிச்சலான நடிப்பை வெளிப்படுத்தினார். பின்னர் வந்த மாமன் படம் குடும்பங்கள் கொண்டாடும் உணர்வுப்பூர்வமான தளத்தை தொட்டது. தற்போது வெளியாகியுள்ள மண்டாடி திரைப்படத்தின் மூலம், “இவர் படத்தை நம்பி குடும்பத்தோடு தியேட்டருக்கு வரலாம்” என்கிற அசைக்க முடியாத நம்பிக்கையை பெண்கள் மத்தியிலும் குடும்ப ரசிகர்கள் மத்தியிலும் விதைத்திருக்கிறார்.
சந்தானம் தனது இருபது படங்களிலும் எட்டத் தவறிய கதாநாயகனுக்கான நம்பகத்தன்மையை, சூரி தனது வெறும் ஆறு படங்களிலேயே நிகழ்த்திக் காட்டியுள்ளார். கதைகளின் சரியான தேர்வு, இயக்குனர்களுக்கான முழுமையான அர்ப்பணிப்பு, ஒவ்வொரு கதைக்கும் தேவைப்படும் கடின உழைப்பு ஆகியவையே சூரியை இந்த உயரத்திற்கு கொண்டு சேர்த்திருக்கிறது. தமிழ் சினிமாவில் தற்போது ‘சூரி படம்’ என்றால் அது தரமான அனுபவத்தைத் தரும் என்ற வணிக ரீதியான உத்தரவாதமும் உருவாகிவிட்டது. இந்த உழைப்பும் கதைத் தேர்வும் தொடரும் வரை, சூரியின் இந்த அசுர வளர்ச்சியை எவரும் அசைத்துப் பார்ப்பது கடினம் என்பதே தற்போதைய கள எதார்த்தம்.